አለም አቀፍ ዜናዎች (110)

Friday, 23 June 2017 09:23

ቻይና 100,000 ከረጢት የእርዳታ ምግብ በኬኒያ በድርቅ ለተጎዱ ሰዎች ሰጠች፡፡

በናይሮቢ በተካሄደው እርዳታውን የማስረከብ ስነስርዓት ላይ በአገሪቱ የቻይና አምባሳደር እንዳሉት እርዳታው ቤጂንግ ለአገሪቱ ለመስጠት ካሰበችው 450000 ከረጢት የእርዳታ ሩዝ ውስጥ የመጀመሪያው ዙር ነው፡፡ ቻይና በኬኒያ በድርቅ ለተጎዱ ወገኖች የምትሠጠው እርዳታ 517 ሚሊዮን ብር ያወጣል፡፡
እርዳታውን በመረከብ ስነስርዓት ላይ የተገኙት የአገሪቱ State department ተቀዳሚ ፀሐፊ ጆሴፍታ ሙኩቤ እንዳሉት ቻይና ለሕዝባችን ያደረገችው ነገር የሚያስመሰግናት ነው ብለዋል፡፡ አክለውም በአሁኑ ወቅት ሙሉ በሙሉ እና በከፊል በድርቅ በተመቱ የአገሪቱ ክፍሎች አስቸኳይ እርዳታ የሚያስፈልጋቸው 3.5 ሚሊዮን ዜጎች ይገኛሉ፡፡
አገሪቱ የመታው ድርቅ የመኖ እጥረት እንዲከሰትና የወተት ምርቱም እንዲያሽቆሎቁል አግርጎዋል፡፡ በተጨማሪም የመሰረታዊ ምግብ ዋጋ ጨምሯል፡፡ የተከሰተው ድርቅ በውኃ ግኝት ላይ አሉታዊ ተፅዕኖ በማሳደሩ ምክንያት የሰብል ምርት እንዲያሽቆሎቁል ያደረገ ጭምር ነው፡፡ ከቻይና የተበረከተው እርዳታ ከሞንባሳ ናይሮቢ በተዘረጋው የባቡር መስመር የተጓጓዘ ነው፡፡

Friday, 23 June 2017 09:20

እ.ኤ.አ በ 2050 የአለም ህዝብ ወደ 10 ቢሊዮን እንደሚጠጋ የተባበሩት መንግስታት ድርጅት አስታወቀ፡፡

በ 2050 ይኖራል ተብሎ በተገመተው የሕዝብ ቁጥር መሰረት ህንድ ከቻይና እንደምትበልጥና በአሁኑ ወቅት ከአፍሪካ በሕዝብ ብዛት በቀዳሚነት የተሰለፈችው ናይጄሪያ 2050 ከመግባቱ ጥቂት ግዜ ቀደም ብሎ አሜሪካን በመብለጥ በአለም ሶስተኛ የሕዝብ ብዛት እንደሚኖራት ተገምቷል፡፡
የአፍሪካ 26 አገራት የሕዝብ ቁጥራቸው በእጥፍ እንደሚያድግና በ 2050 የአለም 47 አገሮች ደግሞ 33 በመቶ ወይንም አሁን ካላቸው 1 ቢሊዮን ዜጎች ወደ 1.9 ቢሊዮን እንደሚጨምር የተባበሩት መንግስታት በትላትናው ዕለት ያወጣው ሪፖርት አመልክቷል፡፡
በዚህ ሪፖርት መሰረት በአለማችን አነስተኛ ወሊድ ያለባቸው አገራት ቻይና፣ አሜሪካ፣ ብራዚል፣ ራሺያ፣ ጃፓን እና ሌሎችም ሆነውዋል፡፡ 60 እና ከ 60 አመት በላይ የሚሆኑ ሰዎች ቁጥር አሁን ካለበት 962 ሚሊዮን በእጥፍ በማደግ 2.1 ቢሊዮን እንደሚሆንም ሪፖርቱ አስቀምጧል፡፡
ዘገባው የ News 24 ነው፡፡

Friday, 23 June 2017 09:16

አይ ኤስ (IS) በኢራቅ ሞሱል የሚገኝ ጥንታዊ መስኪድን አወደመ፡፡

የኢራቅ ጠቅላይ ሚኒስትር ሃይደር አላባዲ እራሱን እስላማዊ መንግስት ብሎ የሚጠራው ፅንፈኛ ቡድን በሞሱል ከተማ የሚገኘውን ጥንታዊ መስኪድ ማውደሙ በጦርነቱ ድል እንዳልቀናውና እየተሸነፈ ስለመሆኑ ማሳያ ነው ብለዋል፡፡
አይ ኤስ (IS) የኢራቅ መንግስት ኃይሎች የሚያደርጉትን ግስጋሴ ለማስቆም ውጊያ ባደረገበት ወቅት ነው አል ኑሪ የተሰኘውን ጥንታዊ መስኪድ እንዳወደመውም የተነገረው፡፡ አይ ኤስ (IS) በበኩሉ ጥንታዊ መስኪዱ የወደመው የአሜሪካ አየር ኃይል በሰነዘረው የአየር ጥቃት እንደሆነ ተናግሮዋል፡፡ ከስምንት መቶ አመታት በላይ እንዳስቆጠረ የሚነገርለት ይህ ጥንታዊ መስኪድ ከአየር ላይ በተነሳ ፎቶግራፍ መሰረት በስፋት ወድሞዋል፡፡
በኢራቅ የአሜሪካን ኮማንደር ሜጀር ጀነራል ጆሴፍ ማርቲን እንዳሉት አይ ኤስ (IS) ያወደመው የኢራቅ እና ሞሱል ታላቁን ሐብት ነው፡፡ አክለውም ይህ ድርጊት በኢራቅ እና ሞሱል ህዝብ ላይ የተፈፀመ ወንጀል እንደሆነ ነው ተናግረዋል፡፡
ግንቦት 2 ቀን 2009 ዓ.ም በተጀመረው ዘመቻ በሺዎች የሚቆጠሩ የኢራቅ ኃይሎች፣ የኩርዲሽ ተዋጊዎች፣ የሱኒ አረቦች እና የሺአ ሚሊሻዎች በአሜሪካ በሚመራው የአየር ላይ ጥቃትና ወታደራዊ ምክር እየታገዙ ቁልፍ ከተማዎችን በቁጥጥራቸው ስር ለማዋል ውጊያ ላይ ናቸው፡፡
የተባበሩት መንግስታት ድርጅት አይ ኤስ (IS) ቢያንስ አንድ መቶ ሺህ ሰዎችን በሞሱል በመያዝ እራሱን ለመከላከል እንደሚችል አስጠንቅቋል፡፡
ዘገባው የ BBC ነው፡፡

Friday, 23 June 2017 09:03

ጠ/ሚ ኃ/ማርያም ደሳለኝና የግብጽ አቻቸው ” የሞት ሽረት “ ተብሎ የሚጠበቀውን የአባይ ተፋሰስ አገራት ስብሰባ ለመሳተፍ ወደ ኡጋንዳ ኢንቴቤ አምርተዋል ፡፡

ጠ/ሚ ኃ/ማርያም ደሳለኝና የግብጽ አቻቸው " የሞት ሽረት " ተብሎ የሚጠበቀውን የአባይ ተፋሰስ አገራት ስብሰባ ለመሳተፍ ወደ ኡጋንዳ ኢንቴቤ አምርተዋል ፡፡ግብጽ በጉባኤው አዲስ አማራጭ ዶክመንት ይዛ እንደምትቀርብ ይጠበቃል ፡፡
ከሰባት አመታት ምልልስ በኋላ ስምምነት ላይ ያለመድረስ ፍጥጫ የነገው ስብሰባ በኡጋንዳው ፕሬዝዳንት ሙሴ ቪኒ ካለፈው አንድ ወር በፊት በቀረበ ጉትጎታ የተሳካ ሲሆን በነዚህ ወራት ለ3 ጊዜ ያህል ቀኖቹ ተቀይረዋል ፡፡ቀነ ቀጠሮው የተቀየረውም ኢትዮጵያ ግብጽ እንደ አማራጭ ያመጣችውን የኢንቴቤውን ስምምነት ማሻሻያ የያዘ ዶክመንት ለማጥና በጠየቀችው መሰረት ነበር፡፡
የኢንቴቤው ስምምነት ላለፉት አመታት በወንዙ 11 ተፋሳሽ አገራት እንዲፈረም የተጠየቀ ሲሆን ብሩንዲ፤ ሩዋንዳ ፤ ዲሞክራቲክ ኮንጎ ፤ ኡጋንዳ ፤ ኬኒያ ፤ ተንዛኒያ ሁለቱ ሱዳኖች ፤ ኤርትራ ፤ እና የነገው ዋነኛ ተዋናይ ተብለው የተጠበቁትና በመሪዎቻቸው የተመሬት ኢትዮጵያና ግብጽ ናቸው፡፡
ከሁለቱ አገራት መሪዎች ውጭ የነገው ስብሰባ ቡድን በምክትል ሚንስትሮችና የውሀ ሀብት ሚንስትሮቻቸው እንደሚመራም ታውቋል ፡፡
የኢንቴቤው ስምምነት ዛሬ ላይ ተለዋጭ ሀሳብ አለኝ ያለችው ግብጽ ፤ እንዲሁም ሱዳን ከጅምሩ ሙሉ በሙሉ ላለመቀበል ወስነው ለአመታት የተጓዙ መሆናቸው ይታወሳል ፡፡

Thursday, 22 June 2017 11:17

አሜሪካ ከፓሪሱ የአየር ንብረት ለውጥ በወጣች ማግስት ምእራባዊ የሀገሪቷ ክፍል አሪዞና በከባድ ሙቀት ተመታ ከ40 በላይ በረራዎች ተሰረዙ፡፡

በአሜሪካ ምእራባዊ ክፍል አሪዞና በተከሰተ ከባድ ሙቀት ምክንያት ፎኒክስ ስካይ ሀርበር የተባለ አየር መንገድ 40 በረራዎችን ሰርዟል፡፡
ከፍተኛ ሙቀት አየሩ እንዲወፍር እና አውሮፕላኖችን ለመነሳት እና ለማረፍ ከባድ እንዲሆንባቸው ያደርጋል፡፡ የአውሮፕላኖችን የተለያዩ ክፍሎችንምያበላሻል፡፡
ዛሬ እና ነገ እስከ 48 ዲግሪ ሴሊሺየስ ድረስ ይደርሳል ተብሎ የተገመተው ሙቀት አየር መንገዱ በትላንትናው እለት ከ 6 ሰአት እስከ 9 ሰአት ባለው ጊዜ ሎስአንጀለስን ጨምሮ ወደ 4 የአሜሪካ ከተማዎችየሚያደርገውን በረራ ሰርዟል፡፡
የአሜሪካው ፕሬዚዳንት ዶናልድ ትራምፕ ለሀገሪቱ ፓርላማ ለ2018 ባወጣው በጀት ላይ የሀገሪቱ የአካባቢ ጥበቃ ኤጀንሲ ቀድሞ ከነበረው 8.2 ቢሊየን ዶላር ላይ 31 ፐርሰንቱን ሲቀንስ ከኤጀንሲው 15ሺህ ሰራተኞች 3500 ይባረራሉ፡፡
ኤጀንሲው ለአየር ንብረት ለውጥ እና ለአካባቢ ጥናት እና ልማት ከሚውል 483 ሚሊየን ዶላር በግማሽ ተቀንሶበታል፡፡
የአሜሪካው ትራምፕ ከፓሪሱ የአየር ንብረት ለውጥ ስምምነትም ሀገራቸውን በዚህ ወር መጀመሪያ ላይ አስወጥተዋል፡፡
በወቅቱ ፕሬዙዳንቱ ከነጩ ቤተመንግስታቸው የጽጌሬዳ የአትክልት ቦታ ሆነው አሜሪካንን እና ዜጎቿን ለመጠበቅ የገባሁትን የማይሻር ቃል ለመጠበቅ አሜሪካን ከፓሪሱ የአየር ንብረት ለውጥ አስወጥቼያታለሁ ብለው ነበር፡፡
የአየር ንብረት ለውጥን በተመለከተ እየተጎዳች ያለችው አሜሪካ ብቻ አይደለችም በሀዋይ ዩኒቨርስቲ ፕፌሰር የሆኑት ካሚሎ ሞር ለአርጀዚራ በሰጡት ቃለመጠይቅ ላይ የአለም 30 ፐርሰንት ህዝብ በየአመቱ ቢያንስ ለ20 ቀን ከአየር ንብረት ጋር ተያይዘው ለሚመጡ ችግሮች ተጋላጭ ነው ብለዋል፡፡ በአየር ንብረት ለውጥ ላይ ችግሮቹን ለመፍታት ተግባራዊ እርምጃ ካልተወሰደም ችግሩ የአለም 50 ፐርሰንት ሰዎችን ወደ ማዳረስ ከፍ ይላል፡፡
በኢትዩጲያ ሮያል ቦታኒክ ጋርደንስ የተባለው የደን ተክሎች እና እጽዋት ጥናት ድርጅት ተሰርቶ በኔቸር ፕላንትስ የታተመ ጥናት በያዝነው ክፍለዘመን መጨረሻ ላይ ኢትዩጲያ መሬቷ በአየር ንብረት ለውጥ ምክንያት ቡና ለማብቀል ተስማሚ እንደ ማይሆን አብራርቷል፡፡
ጥናቱ የሀገሪቱ ሙቀት በፍጥነት እየጨመረ መሆኑን እና በተቃራኒው እያሽቆለቆለ መሆኑን ገልጾል፡፡
በአሜሪካ ከፍተኛ የአየር ንብረት ለውጥ ዜጎቾን ሲያስተጓጉል እና ጥፋት ሲያደርስ የመጀመሪያው አይደለም፡፡
ከ5 አመታት በፊት በሀገሪቷ ቨርጂኒያን እና ኦሀዮን ጨምሮ በስተምስራቅ በሚገኙ ስድስት ክልሎች በነበረ ሀይለኛ ሙቀት 42 ሰዎች ሞተው ነበር፡፡

አልጀዚራ እና ቢቢሲን ዋቢ አድርገን ላጠናከርነው ዘገባ ናርዶስ ዩሴፍ፡፡

Thursday, 22 June 2017 11:04

የኩዌት መንግስት እስር ቤት ለነበሩ ኢትዮጵያውያን ወንጀለኞች ምህረት አድርጓል፤

የኩዌቱ የውጭ ጉዳይ ሚኒስትር አሚር Sheikh Sabah Al-Ahmad Al-Jaber Al-Sabah የእስር ጊዜያቸውን ላላጠናቀቁ ኢትዮጵያውያን ምህረት መደረጉን ተናግረዋል፤
ምህረትን ያደረጉትም የኢፌዲሪ ጠቅላይ ሚኒስትር ኃይለማርያም ደሳለኝ በተለያየ ወንጀሎች ተከሰው በእስር ለሚገኙ ኢትዮጵያውያን ምህረት እንዲያደርጉ ለኩዌት አሚር ባቀረቡት ጥያቄ መሰረት መሆኑን የውጭ ጉዳይ ሚኒስቴር አስታውቋል፤
ዶ/ር ወርቅነህ ገበየሁ ከአሚሩ ጋር በአህጉራዊ የሁለትዮሽ ግንኙነት ዙሪያ በጋራ መክረዋል በኳታርና ባህረ ሰላጤ ሀገሮች መካከል የተፈጠረው ውዝግብ በዲፕሎማሲያዊ መንገድ እንዲፈታም ኢትዮጵያውያ ፅኑ ፍላጎት እንዳላትም ተወያይተዋል፤
ኩዌት በሁለትዮሽ ለመደራደር የምታደርገውን ዲፕሎማሲያዊ ጥረት ኢትዮጵያውያ እንደምትደግፍ ጠቁመው ጥረቱም ስኬታማ እንዲሆን የበኩላቸውን አስተዋፅኦ ለማድረግ ፍላጎት እንዳላት አብራርተዋል፤
በኩዌት ይፋዊ ጉብኝት ያደረጉት የውጭ ጉዳይ ሚኒስትሩ ዶ/ር ወርቅነህ ገበየሁ አሚሩ ለኢትዮጵያውያን ላደረጉት ምህረት በራሳቸውና በመንግስታቸው ስም አመስግነዋል፤
ኢትዮጵያውያ የአፍሪካ ቀንድ ሰላምና መረጋጋት እንዲኖር ለምታደርገው ጥረት አድናቆታቸውን የገለፁት አሚሩ ግንኙነታቸው እንዲጠናከር ኩዌት ፍላጎት እንዳላት አሚሩ አስታውቀዋል፤
ኩዌት በሳዳም ሁሴን አስተዳደር በተወረረችበት ወቅት የኢትዮጵያውያ መንግስትና ህዝብ ያደረጉትን ድጋፍ ያስታወሱት ሼህ ሳባህ ካሊድ ኢትዮጵያውያ ባለውለታችን ነች ብለዋል፡፡ ከኩዬት ተመላሾች ቁጥራቸው እንደማይታወቅና ምህረት የተደረገላቸው ተመላሾች ከኢትዮጵያ መንግስት እንደ ሳውዲ ተመላሾች ሁሉ ምንም ሊያደርግላቸው እንደማይችል የውጪ ጉዳይ ሚኒስትር ቃል አቀባይ አቶ መለስ አለምን በስልክ በጠየቅናቸው ወቅት ገልፀውልናል፡፡
ትብለፅ ተስፋዬ ዘግባዋለች

Thursday, 22 June 2017 09:23

አስራ ሁለት ሺኅ ግመሎችና በጎች የባህረ ሰላጤዉ ፖለቲካ ቀዉስ ሰለባ ሆነዋል

ሳኡዲ አረቢያ ባለቤትነታቸዉ የ ኳታር የሆኑ ሰባት ሺህ ግመሎችና አምስት ሺኅ ያህል በጎችን ከሀገሯ አባራለች
እንስሳቶቹ በጊዜያዊ መጠለያ ምግብ እና ዉሀ እየተሰጣቸዉ እንዲቆዩ መደረጋቸዉን የኳታር ጋዜጣ የሆነዉ peninsula በትናንትናዉ እለት ገልጾ የነበረ ሲሆን al raya የተሰኘዉ ድረ ገጽ ግን የእንሰሳቶቹ ቁጥር ሃያ አምስት ሺህ መሆኑን አስነብቧል
በ ኳታር 22ሺኅ ያህል ግመሎች የሚገኙ ሲሆን ለዉድድር እንዲሁም ለምግብነት ይቀርባሉ ይሁን እንጂ እረኞቹ የግጦሽ መሬት የሚከራዩት ከ ጎረቤት ሀገር ሳኡዲ አረብያ ነዉ
ከዚህም ጋር ተያይዞ ከሪያድ በተላለፈዉ ዉሳኔ የኳታር ገበሬዎችን አበሳጭቷል
የምንፈልገዉ ግመሎቻችንን በሰላም ወደ ሀገራችን መልሰን ቤተሰባችንን መንከባከብ ነዉ በተፈጠረዉ የ ፖለቲካ ቀዉስ ዉስጥ መግባት አንፈልግም ሲሉም ገበሬዎቹ ተናግረዋል
በሳኡዲ የሚመራዉ ቡድንና በኳታር መካከል በተፈጠረዉ በዚህ አለመግባባት እነዚህ ገበሬዎች ግንባር ቀደም ተጠቂዎች ሆነዋል ።
በተጨማሪም እነዚህ ሀገራት ከኳታር ጋር የነበራቸዉን ዲፕሎማሲያዊ ግንኙነት በማቋረጥ አንባሳደሮቻቸዉን የጠሩ ሲሆን አገራቸዉ የሚገኙ የኳታር ዜጎችንም በሁለት ሳምንታት ጊዜ ዉስጥ ለቀዉ እንዲወጡ አዘዋል።

Wednesday, 21 June 2017 09:28

የአሜሪካው ፕሬዝደንት ዶናልድ ትራፕ የ 22 ዓመቱ ኦቶ ዋርሚበር ሞትን ተከትሎ የተሰማቸውን ሃዘን ገለፁ፡፡

ዋርሚበር ለ 17 ወራት በሰሜን ኮሪያ ቁጥጥር ስር ውሎ ከባድ ስራ እንዲሰራ በመደረጉ ምክንያት ወደ አገሩ አሜሪካ ሲመለስ አደገኛ ሁኔታ ላይ እንደነበር ተገልፆዋል፡፡ በዚህም ምክንያት ለሞት እንደተዳረገ ነው የተገለፀው፡፡

በዚህ ወጣት ሞት ምክንያት ፕሬዝደንት ዶናልድ ትራፕ የተሰማቸውን ሐዘን ገልፀው ለዋርሚበር ሞት ምክንያት የሆነውን የሰሜን ኮሪያ አስተዳደር ገደብ ለማስያዝ የሚያደርጉን ጥረት አጠናክረው እንደሚቀጥሉ ገልፀዋል፡፡

Tuesday, 20 June 2017 09:32

ከፖርቹጋሉ የሰደድ እሳት አደጋ 12 ሰዎች በአስገራሚ ሁኔታ መትረፋቸዉ ተሰምቷል

 

ሰዎቹ በህይወት መትረፍ የቻሉት በአካባቢው ውሀ በመቋረጡ ምክንያት ባዶ የነበረ የውሀ ታንከር ውስጥ በመግባት ነዉ ለስድስት ሰአት ያህልም በውሀ ማጠራቀሚያው ውስጥ ቆይተዋል።በህይወት ከተረፉት ውስጥ የ95 አመት አካል ጉዳተኛ ሴት ይገኙበታል።

በውሀ ማጠራቀሚያው ውስጥ ህይወትን የማዳኑ ሀሳብ የመጣው ማሪያ ደቹ ሲልቫ የተባለች ወጣት አካል ጉዳተኛ የሆኑት እናቷን ከሞት ለመታደግ ባደረገችው ጥረት ነው አሁን ታዲያ ማሪያ በፖርቹጋል እንደ ጀግና እየታየች ትገኛለች።

የተነሳው ሰደድ እሳት አሁን በቁጥጥር ስር ዉሏል

ከማእከላዊ ፖርቹጋል በተከሰተው ሰደድ እሳት ከሞቱት ሰዎች መካከል አብዛኛዎቹ በመኪና ውስጥ እያሉ ነው ህይወታቸው ያለፈው  በአደጋዉ ምክንያት የ64 ሰዎች ህይወት ሲያልፍ 130 ያህል ሰዎች ለጉዳት ተዳርገዋል ሲል ሮይተርስ ዘግቧል።

Tuesday, 20 June 2017 08:07

የፕሬዚዳንት ማክሮን ፓርቲ በፈረንሳይ ፓርላማ ምርጫ ከ577 መቀመጫዎች 300 በማግኘት አሸነፈ፡፡

20170323 macron

በፈረንሳይ ፓርላማ ምርጫ የፕሬዚዳንት ኢማኑኤል ማክሮን ፓርቲ አብላጫ መቀመጫ በማግኘት ማሸነፉ ተገልጿል።
የፕሬዚዳንት ማክሮን ፓርቲ ከተቋቋመ ገና አንድ ዓመት ገደማ ሲሆን፥ ከግማሽ በላይ የሆኑት የፓርቲው እጩዎች አነስተኛ እና ምንም አይነት የፖለቲካ ልምድ የሌላቸው ናቸው።
እስካሁን በተደረገው የድምፅ ቆጠራም የፕሬዚዳንት ማክሮን ፓርቲ የሆነው "ላ ሬፐብሊክ ኢን ማርቼ" ተጣማሪው ከሆነው "መኦዴም" ፓርቲ ጋር በመሆን ፓርላማው ካለው 577 መቀመጫዎች ውስጥ 300 መቀመጫ ማግኘታቸውን አረጋግጠዋል።
"የፋር ራይት ናሽናል ፍሮንት" ፓርቲ ስምንት መቀመጫዎችን ብቻ ያሸነፈ ሲሆን፥ በፕሬዚዳንታዊ ምርጫው ከማክሮን ጋር ሲፎካከሩ የነበሩት የፓርቲው ሊቀመንበር ማሪየን ሊ ፐን አንድ መቀመጫ እንዳገኙ ተሰምቷል።
ፕሬዚዳንት ማክሮን ከአውሮፓ ህብረት ጋር ባለው የንግድ ግንኙነት ዙሪያ እና በሌሎች ጉዳዮች ላይ ሊያደርጉት ለሚፈልጉት ማሻሻያዎች የማስፈፀም አቅም የምርጫ ውጤቱ ይጨምርላቸዋል ተብሏል።
በምርጫው የወግ አጥባቂ ሪፐብሊካን እና ተጣማሪዎቻቸው በሚፈጥሩት ጥምረት ከ125 እስከ 131 መቀመጫዎችን መያዝ እንደሚችሉ የተገመተ ሲሆን፥ ይህም ሀይል ያለው የተቃውሞ ጉልበት ይፈጥርላቸዋል ነው የተባለው።
ባለፉት አምስት ዓመታት በስልጣን ላይ የነበረው የሶሻሊስት ፓርቲ ደግሞ ከ41 እስከ 49 የሚደርሱ መቀመጫዎችን ብቻ ማግኘት እንደሚችል ተነግሯል፤ ይህም በፓርቲው ታሪክ ዝቅተኛው ነው ተብሏል።
የዜናው የቢቢሲ ነው

 

Wednesday, 06 April 2016 07:07

ከወደ ፌስቡክ የተሰማ መልካም ዜና፡፡

መጋቢት 28/2008 ዓ.ም

ዛሬ ላይ 1.8 ቢሊዮን ያህል ፎቶዎች በየቀኑ በፌስ ቡክ በትዊተርና በኢንስታግራም ገጾች ላይ ይለጠፋሉ፡፡ የእይታ ብርሃናቸውን ያጡ ሰዎች ፌስ ቡክ ላይ የሚለጠፉ ምስሎችን ለማየት እድል ሳይኖራቸው ቆይቷል፡፡ በርግጥ ኮምፒዩተር ላይ በሚጫን ስክሪን ሪደር በሚባል ሶፍትዌር ጽሁፎችን ሲያነቡ ቢቆዩም ምስሎችን ለመረዳት ግን አልቻሉም ነበር፡፡ አሁን ደሞ ፌስ ቡክ አንድ መልካም የፈጠራ ውጤት ይዞ ብቅ ብሏል፡፡

ይህ የፈጠራ ውጤት በአርቲፊሻል ኢንተለጀንስ (AI) አማካኝነት ፌስቡክና ኢንስታግራም ላይ የሚለጠፉ ምስሎችን በማንበብ የእይታ ብርሃናቸውን ያጡ ተጠቃሚዎች እንዲረዱ ያስችላል ብሏል፡፡ አዲሱ ሶፍትዌር ከሰማኒያ በላይ የምስል ሁኔታዎችን ይተረጉማል፡፡

1- በትራንስፖርት ላይ የመኪና፣ የጀልባ፣ የአውሮፕላን፣ የብስክሌት፣ የባቡር፣ የደረቅ መንገድ፣ የሞተርሳይክል እና የአውቶብስ ምስሎችን በንባብ ያቀርባል፡፡

2- በአካባቢ ሁኔታ ላይ የተራራ፣ ዛፍ፣ በረዶ፣ ሰማይ፣ ውቅያኖስ፣ የውሃ፣ የባህር ዳርቻ፣ የማእበል፣ የጸሃይ እና የሳር ምስሎችን ያነባል

3- ከስፖርታዊ እንቅስቃሴዎች የቴኒስ፣ ዋና፣ ስታዲየም፣ ቅርጫት ኳስ ፣ቤዝቦል እና የጎልፍ ስፖርቶችን ምስል ይተረጉማል

4- ከምግብ ምስሎች ደግሞ አይስክሬም፣ ሱሺ፣ ፒዛ፣ ፍራፍሬዎች እና የቡና ምስሎች ይተረጎማሉ

5- ከአካላዊ መገለጫዎች ደግሞ የህጻናት፣ የጺም፣ የፈገግታ፣ የጌጣጌጥ አቀማመጥ እንዲሁም ራስን በራስ በማንሳት የተለጠፉ ምስሎችን እያነበበ ለተጠቃሚዎች ይናገራል ተብሏል፡፡

የዚህ ቴክኖሎጂ ፈጣሪ ለፌስ ቡክ ከሚሰሩ ኢንጅነሮች አንዱ የሆነውና የእይታ ብርሃኑን ያጣው ኢንጅነር ማት ኪንግ የተባለ ሰው መሆኑም ታውቋል፡፡ ይሄው ሰው ሲናገር "ፌስ ቡክ ላይ የሚለጠፉ ብዙዎቹ ጉዳዮች በምስል የተደገፉ ናቸው፤ የእይታ ብርሃኑን ያጣ ሰው ደግሞ ብዙ ጉዳዮች እያለፉት እንደሆነ ሊያስብ ይችላል" ሲል ተደምጧል፡፡ እኛም መልካም ዜና ብለን አቅርበንላችኋል፡፡ (source BBC)

Tuesday, 05 April 2016 14:05

13 ኢትዮጵያዊያን ስደተኞች በኬንያ ሉንጋ ሉንጋ የኩዋሌ ከተማ በቁጥጥር ስር ዋሉ፡፡

መጋቢት 27/2008 ዓ.ም

በኬንያ ታንዛኒያ ድንበር ላይ 13 ኢቲዮጲያዊያን መያዛቸውን ተከትሎ ፖሊስ በህገ-ወጥ የሰዎች ዝውውር ላይ ጥብቅ ቁጥጥር እና ፍተሻ እያካሄደ ይገኛል፡፡ ከዚህ በፊት መጋቢት 9 ላይ 23 ኢቲዮጲያዊያን በአንድ ቤት ውስጥ በናይሮቢ ተደብቀው መያዛቸውን ዘገባው አስታውሷል ፡፡

13ቱ ስደተኞች ወደ ደቡብ አፍሪካ እየተጓዙ ነበር በማለት የዘገበው ፖሊስ በወቅቱ እንግሊዘኛ መናገር ባለመቻላቸው የምን አገር ዜጎች እንደሆኑ ማወቅ ከባድ ሆኖ የነበረ ሲሆን በስተመጨረሻ ግን ኢትዮጲያዊያን መሆናቸው ታውቋል ያለው The star የዜና ምንጭ ነው፡፡

Wednesday, 10 February 2016 16:14

ቻይና ከካናዳ ንፁህ አየር መግዛት መጀመሯ ተሰማ፡፡

የካቲት 02/2008 ዓ.ም

የአለማችን የግዙፍ ኢንዱስትሪዎች መገኛ የሆነችው ቻይና ከኢንዱስትሪዎቿ በሚለቀቅ በካይ ጋዝ ምክንያት ነዋሪዎቿ እርስ በእርሳቸው መተያየት እስኪያቅታቸው መድረሳቸው፣ ለመተንፈሻ አካላት ህመም ሲጋለጡ፣ የትምህርትና የስራ ሁኔታዎቻቸው ሲስተጓጎሉባቸው ማየት የተለመደ ሆኗል፡፡ ቢቢሲ ይዞት በወጣው መረጃ ደግሞ ቻይናዊያን የንፁህ አየር ያለህ፤ ንፁህ አየር ለሚሸጥልን የተፈለገውን ብር እንከፍላለን እያሉ ነው፡፡ ከወደ ካናዳም ለጥያቄያቸው ምላሽ የሰጠ አልጠፋም፡፡ አንድ የካናዳ ኩባንያ ከሮኪ ተራራ (Rocky Mountain) የጨለፈውን ንፁህ አየር በጠርሙስ እያሸገ ለቻይና ገበያ አቅርቧል፡፡

በእርግጥ ይሄን ንፁህ አየር ከባለፈው ዓመት ወዲህ በምዕራቡ የካናዳ ክፍል ማምረት ቢጀመርም ለመጀመሪያ ጊዜ በገበያ ላይ የዋለው ግን በቻይና ሆኗል፡፡

ከቴሌግራፍ ጋር ቆይታ ያደረገው የድርጅቱ ተባባሪ መስራች Moses Lam በቻይና ገበያ እንደቀናቸው ተናግሯል፡፡ ለዚህም ደግሞ በአራት ቀን ውስጥ ብቻ 500 ንፁህ አየር የተሞሉ ጠርሙሶችን መሸጥ ችለናል ሲል ተደምጧል፡፡

4 ሺህ ሳጥን ንፁህ አየር ጭኖ ወደ ቻይና እየተጓዘ ቢሆንም አብዛኛው ሳጥን ገና ሳይደርስ ገዥዎች ከፍለውበታል ተብሏል፡፡

ይሄው ታሽጎ የሚሸጠው ንፁህ አየር አንዱ ጠርሙስ 7.7 ሊትር መያዝ የሚችል ሲሆን የአንዱ ዋጋ 100 የን (10 ፓውንድ) መሆኑ ታውቋል፡፡ ይሄ ማለት ደግሞ በቻይና የታሸገ ንፁህ ውሃ ከሚሸጥበት ዋጋ በ50 እጥፍ ይበልጣል፡፡

በቅርቡ በተካሄደው የፓሪሱ የአየር ንብረት ጉባኤ የቻይናው ፕሬዝደንት ዢን ፒንግ ቻይና ወደ ከባቢ አየር የምትለቀውን በካይ ጋዝ ትቀንሳለች ብለው ቃል ቢገቡም ዛሬም ድረስ ግን ቻይናውያን የችግሩ ሰለባ መሆናቸው እንደቀጠለ ነው፡፡ (ቢቢሲ እና ቴሌግራፍ)

Wednesday, 06 January 2016 15:46

በጦር መሳሪያ ህግ ላይ የአሜሪካው ፕሬዝዳንት ባራክ ኦባማ ውሳኔ አስተላልፈዋል፡፡

ታህሳስ 27/2008 ዓ.ም

ፕሬዝዳንቱ በንግግራቸው 2012 ላይ በመጀመሪያ ደረጃ ትምህርት ቤት ላይ በደረሰው የተኩስ ጥቃት ህይወታቸውን ያጡትን ያነሱ ሲሆን ንግግራቸውም በእምባ የታጀበ ነበር፡፡ ውሳኔውን ይፋ ከማድረጋቸው በፊት ከከፍተኛ የህግ አስፈፃሚዎች የምክር ቤት አባላት ጋር መክረው ነበር፡፡

በንግግራቸው እንደማህበረሰብ ራሳችንን መመርመር ይገባናል ያሉ ሲሆን ሁሉም የህብረተሰቡን ደህንነትም መጠበቅ አለበት ብለዋል፡፡ አያይዘውም የጦር መሳሪያ ግዢን ለመቀነስ ወሳኝ እርምጃ መውሰድ ተገቢ ነው ማለታቸው ተሰምቷል፡፡

የቀድሞ ሪፐብሊካን ምክር ቤት አባል በአሁኑ ወቅት ደግሞ የመብት ተከራካሪው ቪን ዌበር ውሳኔው በአሜሪካዊያን ዘንድ የተለመደውን የጦር መሳሪያ ባለቤት የመሆን ባህል የሚከላከል ነው ብለዋል፡፡

በሌላ በኩል በ300 ሚሊየን ዶላር በጀት የሚንቀሳቀሰውና 4 ሚሊየን አባላት ያሉት ናሽናል ራይፍል አሶሴሽን የፕሬዝዳንቱን ውሳኔ እንደሚቃወም አስታውቋል፡፡ አነጋጋሪው የፕሬዝዳንትነት እጩ ተወዳዳሪ ዶናልድ ትራምፕ በበኩላቸው ከተመረጥኩ ውሳኔውን በተቃራኒው እተገብረዋለው ማለታቸውን ቢቢሲ ፅፏል፡፡

Wednesday, 02 December 2015 09:28

ቱኒዚያ ለአካባቢ አየር ንብረት ጠንቅ የሆነውን የካርበን ልቀትን በቀጣይ አስራ አምስት ዓመት ጊዜ ውስጥ 47 በመቶ ለመቀነስ ቃል መግባቷ ተነገረ፡፡

ህዳር 22/2008 ዓ.ም

በፈረንሳይ ርዕስ መዲና ፓሪስ አስተናጋጅነት እየተካሄደ በሚገኘው 21ኛው የተባበሩት መንግሥታት ድርጅት የአየር ንብረት ለውጥ ጉባዔ ላይ የታደሙት የቱኒዚያ ጠቅላይ ሚኒስትር ሃቢስ ኤሲብ ሀገራቸው በ2030 የካርበን ልቀትን ለመቀነስ ያስቀመጠችው ግብ 13 በመቶ የሚሆነው ያለ ምንም ቅድመ ሁኔታ በፍቃደኝነት ላይ ተመስርቶ የሚተገበር መሆኑን ጠቁመዋል፡፡

ቀሪ 28 በመቶ የሚሆነው የካርበን ልቀት መጠን ለመቀነስ የገንዘብና ቴክኖሎጂዎችን በመጠቀም እና የተለያዩ የአቅም ግምባታ ስልጠናዎችን በመስጠት ሰፊ ስራዎች እንደሚሰሩ አብራርተዋል፡፡

ቱኒዚያ የአካባቢ አየር ንብረት ለውጥ እያስከተለ የሚገኘውን አሉታዊ ተፅእኖ ለመቀነስ የዓለም አቀፉ ማህበረሰብ የሚደርስባቸውን ስምምነቶችን ተፈፃሚ ለማድረግ ቁርጠኛ አቋም እንዳላት ጠቅላይ ሚኒስትር ሃቢብ ኤሲብ አስምረውበታል፡፡

በአየር ንብረት ለውጥ እየተጎዱ የሚገኙ በማደግ ላይ የሚገኙ ሀገራት  ከዚህ ስጋት ለመላቀቅ የሚያደርጉትን ጥረት የዓለም አቀፍ ማህበረሰብ በተለየ መልኩ በገንዘብ በመደገፍ ከጎናቸው ሊቆም ይገባል በማለት ጠቅላይ ሚኒስትሩ አሳስበዋል፡፡

በፓሪስ እየተካሄደ በሚገኘው 21ኛው የተባበሩት መንግሥታት ድርጅት የአየር ንብረት ለውጥ ጉባዔ ላይ ከመቶ ሀገራት በላይ መሪዎችን ጨምሮ የተለያዩ ባለድርሻ አካላት እየተሳተፉ መሆናቸው ይታወሳል፡፡ ዘገባው Tunis Afrique Press ነው፡፡

Wednesday, 25 November 2015 10:28

በአልጄሪያ አንድ የስደተኞች መጠለያ ጣቢያ ላይ በደረሰ የእሳት ቃጠሎ አደጋ 18 ሰዎች ሞቱ፡፡

ህዳር 15/2008 ዓ.ም

የድንገተኛ አደጋዎች መከላከል ቢሮ ሃላፊዎች ትናንት ማምሻውን እንደተናገሩት በደቡብ ምስራቅ አልጄሪያ ኦዋርጋል ከተማ ላይ በሚገኘው የስደተኞች መጠለያ ጣቢያ ላይ በደረሰው የእሳት ቃጠሎ አደጋ ከ18 የማያንሱ ስደተኞች ለሞት የተዳረጉ ሲሆን ከ43 በላይ ሌሎች ደግሞ የከፋ ጉዳት እንደደረሰባቸው ታውቋል፡፡

ሳይዳ ቤንሃቢል የተባሉት የሀገሪቱ ቀይ መስቀል ማህበር የበላይ ጠባቂ አደጋው ከማሞቂያ ክፍል በተነሳ እሳት የተከሰተ ነው ያሉ ሲሆን መንስኤው ይህ ብቻ ነው ብለን ግን እርግጠኞች አንሆንም ተጨማሪ ምርመራ እናደርጋለን ሲሉም ተናግረዋል፡፡ አልጄሪያ ከባለፈው ዓመት ጀምሮ ወደ ሀገሯ የሚገቡ ስደተኞችን በተለይም ከናይጄሪያ ቦኮሃራንም ሽሽት የመጡ ከ4,000 በላይ ስደተኞችን ተቀብላ እያስተናገደች ሲሆን ከ400 በላይ የሚሆኑትንም ሰላማዊ ወደሆኑ የናይጄሪያ ከተሞች ስትመልስ መቆየቷን አስታውሶ የፃፈው ፕረስ ቲቪ ነው፡፡

Monday, 16 November 2015 16:19

እስራኤል ዘጠኝ ሺህ ቤተ-እስራኤላዊያን እንዲገቡ ልትፈቅድ ነው፡፡

ህዳር 06/2008 ዓ.ም

ጄሩሳሌም ፖስት ትናንት የሀገሪቱን ካቢኔ ዋቢ አድርጎ እንዳስነበበው የእስራኤል መንግስት ከሁለት ዓመት በፊት ኢትዮጵያ ውስጥ የቀሩ እስራኤላዊያን የሉም ቢልም አሁን ላይ ግን ዘጠኝ ሺህ የሚደርሱ ዜጎቼ በኢትዮጵያ በአዲስ አበባ እና ጎንደር ከተማዎች ይገኛሉ ያለ ሲሆን እነዚህን በሽዎች የሚቆጠሩ የእስራኤል የዘር ሀረግ ያላቸውን ዜጐች ወደ እስራኤል እንዲገቡ የሚፈቅደውን ህግ አጽድቄያለሁኝ ብሏል፡፡ ሀገሪቱ በሯን ለቤተ እስራኤላውያኑ እ.ኤ.አ ከ2013 ጀምሮ ዘግታ እንደነበር ይታወሳል፡፡

ምንጭ- The Jerusalem post

Wednesday, 04 November 2015 14:49

ፌስ ቡክ ሰዎች አለምን በቀላሉ እንዲረዱ ያስችላል ያለውን የሰው ሰራሽ አዕምሮ ሶፍት ዌር ልሰራ ነው ብሏል፡፡

ጥቅምት 24/2008 ዓ.ም

ዛሬ ላይ1.5 ቢሊየን በላይ ተጠቃሚ አለው የሚባልለት ፌስቡክ ያለምንም ረዳት ፌስቡክ ላይ በሚጫንላቸው አዲስ ሶፍትዌር የሚፈልጉትን ምግቦች፣ ልብስ፣ መዝናኛ፣ የእቃ ዋጋ፣ ቦታዎች እና የተለያዩ መረጃዎችን ተጠቃሚዎች እንዲያገኙ ያስችላል ያለውን ይህን የሰው ሰራሽ አዕምሮ ሶፍትዌር M የሚል ስያሜ ሰጥቶታል፡፡

ይህ ሶፍትዌር ከቻይናውያን Go ከተባለው ጌም የተወሰደ ነው ተብሏል፡፡ ይኸው ሶፍትዌር የምንጠይቀውን ማንኛውም ጥያቄ በፎቶ የታገዙ መልሶችን ለጠያቂዎች ይሰጣል ተብሏል፡፡

ይሄን ፈጣን ምላሽ የሚሰጥ ሶፍትዌር ጉግል፣ አፕል፣ ማይክሮሶፍት እና IBM ለመተግበር ጥናት ላይ ናቸው ያለው ዴይሊ ሜል ነው፡፡