አለም አቀፍ ዜናዎች (169)

Tuesday, 03 March 2015 14:51

የኢራቅ የፀጥታ ሃይሎች ቲክሪት ከተማን ከአይ ኤስ ፅንፈኛ ቡድን ለማስለቀቅ አዲስ ተልዕኮን ጀመሩ፡፡

የካቲት 24/2007 ዓ.ም

ወደ 30,000 የሚጠጉ የጦር ሃይሎች በተለያዩ ጀቶች ድጋፍ እየተደረገላቸው እንቅስቃሴያቸውን ጀምረዋል፡፡

የአሜሪካ ጦር የሞሲል ከተማን በእጁ ለማስገባት 25,000 የኢራቅ ጦርን አስከትሎ እንቅስቃሴውን ሚያዝያ ላይ ነበር የጀመረው፡፡

እንደ አል-ኢራቂያ ቴሌቪዥን ጣቢያ ዘገባ ከሆነ የቲክሪትን ከተማ በተለያዩ አቅጣጫዎች የአየር ጥቃት እየተሰነዘረ ይገኛል፡፡አይ ኤስ በዚች ከተማ 4 ሰዎችን መግደሉም ተገልጧል፡፡

Tuesday, 03 March 2015 14:39

ከባለፈው ዓመት ጀምሮ በምስራቅ ዩክሬን በአመፁ ሳቢያ የሞቱት ሰዎች ቁጥር ከ6,000 እንደሚልቅ የተባበሩት መንግሥታት ድርጅት አስታወቀ፡፡

የካቲት 24/2007 ዓ.ም

የተባበሩት መንግሥታት ድርጀት የሰብዓዊ መብት ከፍተኛ ኮሚሽነር የሆኑት ዛይድ ራኢድ አል ሁሴን ትላንትና ሪፖርቱን ሲያቀርቡ እንደገለፁት በዩክሩን እና በአማፂያኑ መካከል በተደረገው ጦርነት ነው ሰዎቹ ህይወታቸውን ያጡት፡፡ አብዛኛዎቹም ንፁሃን ዜጎች ናቸው ተብሏል፡፡

እስካሁን በአካባቢው ባለው አለመረጋጋት ጉዳት የደረሰባቸው ሰዎች ቁጥር ወደ 14,000 እየተጠጋ እንደሆነ ሪፖርቱ አመላክቷል፡፡ ዘገባው የፕሬስ ቲቪ ነው፡፡

Tuesday, 03 March 2015 14:28

በአልጀሪያ በተነሳ ብጥብጥ 40 የፀጥታ ሃይሎች ለጉዳት ተዳረጉ፡፡

የካቲት 24/2007 ዓ.ም

የሀገሪቱ ዜጎች ሼል የተባለውን የነዳጅ  አምራች ካምፓኒን በመቃወም አደባባይ በወጡበት ወቅት ግጭቱ እንደተቀሰቀሰ  የአልጄሪያ ሀገር ውስጥ ሚኒስቴር መስሪያቤት በመግለጫው አስታውቋል፡፡

ኪንና ሳላህ በተባሉት ከተሞች በፀጥታ ሃይሎችና በሰልፈኞቹ መካከል በተነሳው ግጭት ለጉዳት ከተዳረጉ 40 የፀጥታ ሃይሎች መካከል ሁለት አባላት የከፋ ጉዳት እንዳጋጠማቸው ተጠቁሟል፡፡ ሰልፈኞቹ በንብረት ላይም እንዲሁ በተመሳሳይ ጉዳት ማድረሳቸውን AFP ዘግቧል፡፡

Tuesday, 03 March 2015 14:16

በናይጄሪያ ዋና ዋና ከተማዎች የነጃጅ እጥረት መከሰቱ ተገለፀ፡፡

የካቲት 24/2007 ዓ.ም

የካቲት ከባለፈው ሳምንት ጀምሮ ዋጋ እየጨመረ መምጣቱን ተከትሎ ነው በከተማዎቹ እጥረት የተከሰተው ተብሏል፡፡

በአቡጃ እና ሌጎስ እረጃጅም የመኪና ሰልፎችም ተስተውለዋል፡፡ እንደ ዴይሊ ትረስት ዘገባ  የትኛውም የመንግሥት ሃላፊ ለእጥረቱ ምክንያት መልስ አልሰጠም፡፡ በዋና ዋና የሀገሪቱ ከተሞች በጥቁር ገበያ ነዳጆች ይሸጣሉ፡፡

በየቀኑ የሚመረተውን እና ገበያ የሚቀርበውን በማመጣጠን ችግሩ ሊቀረፍ ይችላል ሲሉ የሀገሪቱ መኪና አሽከርካሪዎች አስተያየታቸውን ሰጥተዋል፡፡ ዘገባው የዴይሊ ትረስት ነው፡፡

Monday, 16 February 2015 09:07

ግብፅ በሊቢያ አይ ኤስ የሚገኝባቸው ቦታዎቸ ላይ ጥቃት አደረሰች፡፡

የካቲት 9/2007 ዓ.ም

ከአንድ አመት በፊት በግብፅ እና በሊቢያ የተያዙት ግብፃውያን አይ ኤስ ቡርት ካናማ ቱታ አልብሷቸው ሲገደሉ የሚያሳይ ቪዲዮ አሰራጭቷል፡፡

ይህን ተከትሎ ግብፅ በሊቢያ አይ ኤስ በያዛቸው ስፍራዎች ላይ ጥቃት መሰንዘሯን አስታውቃለች፡፡ የግብፅ ጥቃት የቡድኑ ካምፕ የልምምድ ቦታዎች፣ የመሳሪያ ማከማቻ ኢላማ ያደረገ ነበር፡፡

የግብፁ ፕሬዝዳንት አብዱል ፈታህ አልሲሲ ግብፅ ለማንኛውም ጥቃት አፀፋዊ ምላሽ እንዳላት መናገራቸውን ቢቢሲ ዘግቧል፡፡

Thursday, 18 December 2014 09:37

የአሜሪካ እና የኩባ መሪዎች ሰላማዊ የዲፕሎማሲያዊ ንግግር መጀመራቸው በሀገራቱ መሀከል የተደረገ ትልቅ ለውጥ ነው ተብሏል፡፡

ታህሳስ 09/2007 ዓ.ም

የአሜሪካ ባለስልጣናት ለሀገራቱ የመገናኛ ብዙሃን እንዳስታወቁት አሜሪካ በቀጣይ ወራት በኩባ ሃቫና ኤምባሲዋን ልትከፍት እንደምትችል ተናግረዋል፡፡ ሀገራቱ ለዚህ ትብብር ለመድረሳቸው እንደምክንያትነት የተቀመጠው የአሜሪካዊው እስረኛ እና ሶስት የኩባ እስረኞች መለቀቅ ነው፡፡ አሜሪካዊው የ65 ዓመት እድሜ ባለቤት የሆነው አለን ግሮስ ለ15 ዓመታት ያህል በኩባ በእስር ላይ እንደቆየ የተነገረ ሲሆን በአሜሪካ መንግሥት ጥረት እና የሰብዓዊ መብት ድርጅቶች ባደረጉት ድጋፍ ለመለቀቅ በቅቷል፡፡ የአሜሪካ ፕሬዝዳንት ባራክ ኦባማ እንደተናገሩት ሀገራቱ አሁን ላይ የጀመሩት ዲፕሎማሲያዊ ንግግር ትልቅ ለውጥ ነው በማለት በ50 ዓመት ውስጥ ያልታየ ነው ብለውታል፡፡

በአሜሪካ ፍሎሪዳ ግዛት የነበሩት ሶስቱ ኩባዊያንም ለመለቀቅ በቅተዋል፡፡ እ.ኤ.አ ከ1959 በኋላ የሁለቱ ሀገራት መሪዎቸ በአካል ለመገናኘት እና ለመወያየት ባይችሉም የደቡብ አፍሪካዊያን አባት ኔልሰን ማንዴላ የቀብር ስነ-ስርዓት ላይ እንደተገናኙ የአጃንስ ፍራንስ ፕሬስ ዘገባ ነው ያመላከተው፡፡ ፕሬዝዳንት ኦባማ በቴሌቪዥን ታይተው ከኩባ ጋር ስለሚሻሻለው ፖሊሲ በተናገሩበት ሰዓት የኩባ መሪም ራውል ካስትሮል በሀገሪቱ ቴሌቪዥን ጣቢያ በመቅረብ ይህንኑ ተናግረዋል፡፡ ሀገራቱ ከዚህ ውሳኔ ለመድረስ የ18 ወራት ድርድር የፈጀባቸው ሲሆን በቀጣይም የሀገሪቱ ከፍተኛ ባለስልጣናት ልዑካን ቡድን አባላት ወደ ሀገሪቱ ያቀናሉ ተብሏል፡፡ዜናው የአጃንስ ፍራንስ ፕሬስ ነው፡፡

Friday, 21 November 2014 09:51

ቻይና ለጊኒ የ5 ሚሊዮን ዶላር የገንዘብ ድጋፍ አደረገች፡፡

ህዳር 12/2007 ዓ.ም

ቻይና ይህን የገንዘብ ድጋፍ ያደረገችው ጊኒ በኢቦላ ቫይረስ ስርጭት ላይ እያደረገች ያለችው የመከላከል ዘመቻ ለማገዝ ነው ተብሏል፡፡

በዚህ የገንዘብ ድጋፍ ሀገሪቱ ህሙማን ማመላለሻ የሚሆን አምቡላንስ በቂ አልጋ እና የመድኃኒት እንዲሁም የህክምና መገልገያ መሳሪያዎችን መግዛት እና እንቅስቃሴዋን ማጠንከር ትችላለች የተባለ ሲሆን ይህ ደግሞ ፈጣን የሆነ ህክምናን እና እንክብካቤን ለኢቦላ ተጠቂዎች እንድትሰጥም ያግዛታል ተብሏል፡፡

የጊኒ ዓለም አቀፍ ግንኙነት ሚኒስትር የሆኑት ሙስጠፋ ካኖህ ለዥንዋ እንደተናገሩት ይህ የቻይና የገንዘብ ድጋፍ ተጨማሪ ድጋፍ ነው ያሉ ሲሆን ከዚህ ቀደም ሀገሪቱ ለጊኒ ያደረገችው የህክምና መሳሪያ ፣ የጤና ባለሞያ ሃይል እና የገንዘብ ድጋፍ አስታውሶ አሁን የተደረገልን ድጋፍ ደግሞ በሽታውን በመከላከል ረገድ ከፍተኛ ስራን እንድንሰራ ይረዳናል ብለዋል፡፡

ይህ 5 ሚሊዮን ዶላር የገንዘብ ድጋፍን አምቡላንስ እና አልጋ፣ የህክምና መሳሪያዎችንም ለመግዛት ይውላል ሲሉ ሚኒስቴሩ ተናግረዋል፡፡

ጊኒ 2013 ላይ የኢቦላ ቫይረስ በደቡባዊ የሀገሪቱ ክፍል ታይቶባት የነበረች እና አሁን በርካታ ዜጎችን በቫይረሱ ምክንያት እያጣች ያለች ሀገር ናት ሲል ዥንዋ ዘግቧል፡፡

Tuesday, 18 November 2014 10:10

ያለፈው ዓመት ከፍተኛ የሽብር ጥቃት የተመዘገበበት ዓመት እንደነበር አንድ ጥናት አመላከተለ፡፡

ህዳር 09/2007 ዓ.ም

የፈረንጆቹ 2013 10ሺ ገደማ የሽብር ጥቃቶችን ያስተናገደ ሲሆን በ2012  ከነበረው ጥቃት ጋር ሲነፃፀር 44 በመቶ ጭማሪ አሳይቷል፡፡ መቀመጫውን ለንደን ያደረገው የኢኮኖሚና የሰላም ተቋም እንዳስታወቀው ዓመቱ ለ18 ሺህ ሰዎች ሞት ምክንያት የሆኑ የሽብር ጥቃቶች የተፈፀመበት ነበር ተብሏል፡፡

አራት ዓለም አቀፍ የሽብር ቡድኖች ደግሞ ጥቃቶቹን በማድረስ ቀዳሚ ናቸው የተባለ ሲሆን እነዚህም አይ ኤስ፣ ቦኮሃራም፣ አልቃይዳና ታሊባን ናቸው ተብሏል፡፡

እነዚህ ዋና ዋና የሽብር ቡድኖች አለማችን በዓመቱ ካስተናገደቻቸው ጥቃቶች ውስጥ 66 በመቶ ያህሉን ሃላፊነት ወስደዋል፡፡ የሽብርተኝነት ሰለባ በመሆን ቀዳሚ የሆነችው ሀገር ደግሞ በጥቃቱ ከ6,300 በላይ ዜጎቿን ያጣችው ኢራቅ መሆኗንና በ2013 ብቻ 2,492 የሽብር አደጋዎችን ማስተናገዷ ተነግሯል፡፡

በኢራቅ ላለው የሽብር ጥቃት አብዛኛው የአይ ኤስ እጅ ያለበት ሲሆን የዓለማችን 80 በመቶ የሽብር ጥቃት በ5 ሀገሮች ብቻ ማለትም በኢራቅ፣ አፍጋኒስታን፣ ፓኪስታን፣ ናይጄሪያና ሶሪያ ላይ የተፈፀመ ስለመሆኑ ሪፖርቱ አመላክቷል፡፡ ዘገባው የቢቢሲ ነው፡፡ 

Tuesday, 18 November 2014 10:03

ሩሲያ በሀገሯ ብዛት ያላቸውን የፖላንድ ዲፕሎማቶችን ከሞስኮ እንዳስወጣች ተነገረ፡፡

ህዳር 09/2007 ዓ.ም

የሩሲያ የውጪ ጉዳይ ሚኒስቴር እንዳመላከተው ዘገባው ከዲፕሎማት ስራ ጋር የማይጣጣም እና  በሀገራቱ መሀከል ያለውን ግንኙነት እጅግ የሚያሻክር ተግባር ፈፅመዋል ብለዋል፡፡

የፖላንድ ዲፕሎማቶች የተወቀሱበት ወንጀል በሩሲያ ላይ የስለላ ተግባር ሲፈፅሙ ተገኝተዋል በሚል ነው፡፡ ይኸንንም ተከትሎ የፖላንድ ዲፕሎማቶች ሩሲያን ለቀው ወጥተዋል፡፡ ሆኖም ቀደም ሲል ፖላንድ ከሀገሯ የሩሲያ ባለስልጣን ማባረሯን ተከትሎ የሩሲያ ምላሽ የተሰጠበት እርምጃ ነው ሲል ሮይተርስ ዘግቧል፡፡

Monday, 17 November 2014 09:39

በአሜሪካ የጎዳና ተዳዳሪ ህፃናት ቁጥር በከፍተኛ ደረጃ መጨመሩ ተሰማ፡፡

ህዳር 08/2007 ዓ.ም

የአሜሪካ ቤት አልባ ሰዎች ብሔራዊ ማዕከል ዛሬ ባወጣው ሪፖርቱ እንዳስታወቀው በእነሱ አቆጣጠር እስከ 2013 መጨረሻ 2.5 ሚሊዮን የአሜሪካ ህፃናት ለጎዳና ተዳዳሪነት መዳረጋቸውን ይፋ አድርጓል፡፡

በተለይም ደግሞ እንደ ካሊፎርኒያ፣ ሚሲሲፒና አላባማ ባሉ ግዛቶች ችግሩ አሳሳቢ መሆኑንና በካሊፎርኒያ ብቻ 527ሺ ህፃናት ቤት አልባ መሆናቸው ተገልጧል፡፡

የማዕከሉ ዳይሬክተር የሆኑት ካርሜላ ዲካንዲያ በሪፖርቱ እንዳካተቱት የአሜሪካ መንግሥት በወጣቶችና አረጋዊያን ላይ የነበረውን የቤት አልባነት ችግር ለመቀነስ ጥረት ቢያደርግም ተመሳሳይ ትኩረት ለህፃናት አልተሰጠም ብለዋል፡፡

የህፃናት ቤት አልባነት መጠን በ2012 ከነበረው ጋር ሲነፃፀር 8 በመቶ ጭማሪ ማሳየቱንና ይህም ህፃናቱ በማህበራዊ ግንኙነት፣ በትምህርትና በስነ-ልቦና የሚደርስባቸውን ጫና የሚያባብስ ነው ተብሏል፡፡

Monday, 17 November 2014 09:25

የተባበሩት አረብ ኤምሬት ሀገሪቱ እና አካባቢውን በሽብር ያሰጉታል፤ አላማቸውም ከሰላም የራቀ ነው ያለቻቸውን 80 ቡድኖች በጥቁር መዝገቧ አሰፈረች፡፡

ህዳር 08/2007 ዓ.ም

ሀገሪቱ በሽብርተኝነት ከመደበቻቸው ቡድኖች መካከል በሶሪያ እና በኢራቅ ለበርካቶች ሞት እና ስደት ምክንያት የሆነው የIS ፅንፈኛ ቡድን አልቃይዳ እና አልኑስራ ይጠቀሳሉ ሲሉ ዘገባዎች አመላክተዋል፡፡

በሀገሪቱ ይንቀሳቀስ የነበረው የአል ኢስላ ቡድን ከግብፅ የሙስሊም ወንድማማቾች ፓርቲ ጋር በመተባበር ምንም አይነት እንቅስቃሴ በሀገሪቱ እንዳያደርግ እገዳ ተጥሎበታል፡፡ ዘገባው የሚድል ኢስት ኦንላይን ነው፡፡

Friday, 14 November 2014 10:43

የቻይና ኢኮኖሚ የመዳከም አዝማሚያ እንደታየበት ሪፖርቶች አመላከቱ፡፡

ህዳር 05/2007 ዓ.ም

በጥቅምት ወር የቻይና የኢንዱስትሪ ምርቶች በ7.7 በመቶ ያደገ ሲሆን፤ በዚህ ወቅት የችርቻሮ ግብይት ላይ 11.5 በመቶ ያህል ከፍ ማለቱ ታውቋል፡፡

ሆኖም ግን ቀደም ሲል ኢኮኖሚስቶች ተንብየውት ከነበረው የኢንዱስትሪ ምርቶች 0.3 በመቶ ቅናሽ ሲያሳይ የችርቻሮ ንግድ ላይ 0.1 በመቶ መቀዛቀዝ ታይቶበታል ተብሏል፡፡

በተጨማሪ ጠቃሚ እና የኢኮኖሚ ጠቋሚ የሆነው የማይንቀሳቀው የሃብት ኢንቨስትመንት መጠን በመስከረም ወር ከነበረው የ16.1 በመቶ በመውረድ 15.9 በመቶ ሆኖ ተቀምጧል፡፡

እነዚህ እውነታዎች እንደሚያመላክቱት ከሆነ እ.ኤ.አ በ2014 ሦስተኛው ሩብ ዓመት በአምስት ዓመት ውስጥ ከተመዘገበው ዝቅተኛ ሆኖ ተገኝቷል፡፡

መንግስት ድጋፉን ማድረግ ከቻለ እየወረደ ያለውን ኢኮኖሚ መታደግ እንደሚቻል የA N Z ባንክ ኢኮኖሚስት የሆኑት ዙሁ ሀኦ ተናግረዋል፡፡

በመስከረም ወር የከተማ የሥራ አጥ ቁጥር መጠን 4.07 መድረሱን ቢቢሲ ዘግቦታል፡፡  

Friday, 14 November 2014 10:39

በሊቢያ የግበጽና የተባበሩት አረብ ኤምሬትስን ኤምባሲዎች ለማውደም ታስቦ የተጠመደው ቦምብ የከፋ ጉዳት አለማድረሱ ተነገረ

ህዳር 05/2007 ዓ.ም

ቦምቡ በመኪና ላይ እንደተጠመደ የተነገረ ሲሆን፤ ዒላማው ደግሞ በሊቢያ ዋና ከተማ ላይ የሚገኙትን የግብጽና የተባበሩት አረብ ኤምሬትስ (UAE) ኤምባሲዎች ለማውደም እንደነበረ ነው የዜና ምንጮች የተናገሩት፤

የኢስላማዊ ጽንፈኛ ኃይሎች ናቸው በተባሉት ታጣቂዎች አማካኝነት የሃገሪቱ ሁለት ዋነኛ ከተሞች ትሪፖሊ እና ቤንጋዚ በከፍተኛ ሁከት ውስጥ ናቸው የተባለ ሲሆን በርካታ ኤምባሲዎች ቢሮዎቻቸውን ዘግተዋል፡፡

ዓለም አቀፍ ተቋማትም ሃገሪቱን ለቀው ወጥተው እየተባለ ይገኛል፡፡ የግብጽ የውጪ ጉዳይ ሚኒስቴር ተናገረ እንደተባለው አሁን በሃገሪቱ እየተከሰተ ያለው ክስተት ታሪካዊ የደም መፋሰስ ክስተት ነው፤ የአማጽን ቡድኑ ኃይልን በመጠቀም ፖለቲካዊ ዓላማውን ግብ ለመምታት ይፈልጋል፤ በዚህም የብዘ ንጹሃን ደም በከንቱ ይፈሳል ሲል ተደምጧል፡፡

የሁለቱ ሃገራትን ኤምባሲዎች ለማውደም ታስቦ የተጠመደ ነው የተባለው ቦምብ መጠነኛ ጉዳትን በህንጻው ላይ ከማድረሱ ባለፈ ምንም ያደረሰው ሌላ ጉዳት የለም ተብሏል፡፡

ከትናንት በስቲያ በተመሳሳይ በሃገሪቱ ምስራቃዊ ክፍሎች ቲብሩክ እና ባይዳ ላይ በመኪና በተጠመደ ቦምብ ስድስት ሰዎች ሲሞቱ፤ 21 ያህል የከፋ ጉዳት እንደደረሰባቸው ተነግሯል፡፡

የዚህ ጥቃት ዓላማ የተባለው በህዝብ የተመረጡትን የፓርላማ አባላትና የመንግስት አካላትን ለማጥቃት እንደነበርም ተያይዞ ተዘግቧል፡፡ ዘገባው የአሶሼትድ ፕሬስ ነው፡፡

Thursday, 13 November 2014 11:03

የአሜሪካ ኤምባሲ በሴራሊዮን ከጊዜ ወደ ጊዜ እየጨመረ የመጣው የኢቦላ ቫይረስ ስርጭት ምክንያት በቂ ጥንቃቄና ቁጥጥር አለመደረጉ እንደሆነ አስታወቀ፡፡

ህዳር 04/2007 ዓ.ም

በተለይም ኤምባሲው ከቫይረሱ ስርጭት ጋር በተያያዘ በዚህ ሳምንት እንኳን ጥንቃቄ የጎደላቸውና በባለሞያ ያልታገዘ የቀብር ስነ-ስርዓት እንደሚከናወን ታዝቤያለሁ ብሏል፡፡

ተያይዞ የወጣው ዘገባ እንዳመላከተው በሴራሊዮን ወደ 32 በመቶ የሚጠጉት ዜጎች ያለንኪኪ አስክሬኑ ሳይታጠብ የሚከናወነውን የቀብር ስነ-ስርዓት አይቀበሉትም፡፡

ከሀገሪቱ ከፍተኛ የመንግሥት ባለስልጣናት አዲስ ይፋ የሆነው መግለጫ የቫይረሱን መስፋፋት ለመቀነስ እንዲቻል ቫይረሱ መገታቱ እስካልተረጋገጠ ድረስ በማንኛውን ምክንያት የሚፈጠር ሞት የቀብር ስነ-ስርዓቱ ያለንክኪ እንዲፈፀም የሚያዝ ነው፡፡ ዜናው የቢቢሲ እና የዢንዋ ነው፡፡

በሌላ ዜና በሴራሊዮን የኢቦላ ህሙማንን ለማከም የተመደቡ ከ400 በላይ የሚሆኑ የጤና ባለሞያዎች የስራ ማቆም አድማ አድርገዋል፡፡ ነርሶችንና የፅዳት ሰራተኞችን ያማከለውና ተቃውሞውን እያሰማ ያለው ቡድን መንግሥት በሳምንት ሊከፍለን ቃል የገባውን 100 ዶላር አላሟላም የሚል ቅሬታንም እያሰሙ ነው፡፡

የዓለም የጤና ድርጅት አዲስ ባወጣው ሪፖርት በኢቦላ ቫይረስ ምክንያት ህይወታቸውን ያጡት ቁጥር 5,160 መድረሱን አመላክቷል፡፡

በበሽታው የተያዙት ቁጥራቸው አሻቅቧል፤ በምእራብ አፍሪካ ሀገራት ከ14,000 የሚበልጡ መያዛቸውም ተረጋግጧል ሲል ቢቢሲ አስነብቧል፡፡

Thursday, 06 November 2014 11:46

በሰሜን ምስራቅ ናይጄሪያ ግዛት እየተባባሰ በመጣው ጥቃት ምክንያት ወደ 17,000 የሚጠጉ ዜጎች መኖሪያ ቀያቸውን ለመልቀቅ እንደተገደዱ የተባበሩት መንግሥታት ድርጅት አስታወቀ፡፡

ጥቅምት 27/2007 ዓ.ም

ሪፖርቱ እንዳስነበበው ለሀገሪቱ ስጋት የሆነው ቦኮሃራም በሳምንት ውስጥ በየእለቱ በሚባል ደረጃ ጥቃት ይፈፀማል፡፡ ከተፈናቃዮቹ መካከልም 6,000 የሚሆኑት ህፃናት ናቸው፡፡

የተባበሩት መንግሥታት ድርጅት በቀጣይ ግዜያትም መኖሪያ ቀያቸውን ለመልቀቅ የተገደዱትን በመመዝገብ ላይ መሆኑ የተገለፀ ሲሆን ለስደት የተዳረጉም ምዝገባውን እንዲያካሂዱና የሚታደለውን ግብዓት ተጠቃሚ እንዲሆኑ ጥሪ ቀርቧል፡፡

ባለፈው ወር አጋማሽ ላይ የናይጄሪያ መንግሥትና ታጣቂው ቦኮሃራም የተኩስ አቁም ስምምነት ማድረጋቸውን የናይጄሪያ መንግስት አስታውቀው ነበር፡፡ ተከትለው የወጡ የዜና ምንጮች ግን ታጣቂ ቡድኑ የተኩስ አቁም ስምምነቱን አለማድረጉንና ይለቀቃሉ ተብለው የሚጠበቁት ከ200 የሚበልጡ ልጃገረዶችም ከተዋጊዎች ጋር በጋብቻ እንደሚተሳሰሩ ማስታወቁን አስታውሶ የዘገበው ዥንዋ ነው፡፡

Wednesday, 05 November 2014 15:11

በሊቢያ ትሪፖሊ ታዋቂ አውራ ጎዳና ላይ ከጣሊያን ዘመን ጊዜ ጀምሮ የተሰራው ሃውልት ሚስጥራዊ በሆነ መልኩ ከቦታው ተሰውሯል፡፡

ጥቅምት 26/2007 ዓ.ም

ራቁቷን የሆነች ሴት ግመልን ይዛ የሚያሳየውን ታሪካዊ ሀውልት እስካሁን ድረስ  ማን እንደወሰደው የታወቀ ነገር ባይኖርም ብዙዎች ግን እስላማዊ ታጣቂ ቡድኑን ተጠያቂ እያደረጉ ነው፡፡ ጣሊያን ሊቢያን ገዝታ ከነበረበት ግዜ ጀምሮ በቦታው ላይ ተቀምጦ የቆየ ሃውልት ነው፡፡

የሊቢያ ባለስልጣናት የሀውልቱን መጥፋት አውግዘውታል፡፡ በሀገሪቱ ያሉ ዜጎችን የምንጠይቀው የሊቢያን አይረሴ ቅርሶች እንዲጠብቁ ወይም ለመጠበቅ የሚደረገው ጥረት ላይ እንዲተባበሩ ነው ብለዋል፡፡ በቀጣይነትም በቦታው ላይ ካሉት ባለስልጣናት ጋር በመተባበር ወንጀለኞቹን ለመያዝ እንደሚሰሩ አስታውቀዋል፡፡ ዘገባው የቢቢሲ ነው፡፡

Tuesday, 04 November 2014 10:54

ቻይና እና ኳታር ወዳጅነታቸውን በተለያዩ ዘርፎች ለማጠናከር ተስማሙ፡፡

ጥቅምት 25/2007 ዓ.ም

የኳታር ንጉስ በቻይና ባደረጉት ጉብኝት ነው ሀገራቱ ከስምምነት የደረሱት፡፡ የኳታር ንጉስ በትላንትናው ዕለት ነበር ወደ ቻይና ያቀኑት፡፡ ሁለቱ የሀገር መሪዎች በአጠቃላይ ግንኙነታቸው ዙሪያ ሰፊ ሰዓት ወስደው እንደተነጋገሩ ዘገባዎች አመላክተዋል፡፡ የቻይናው ፕሬዝዳንት ዢ ቺን ፒንግ ከኳታር ጋር ያላቸው ግንኘነት ማደጉ ለሁለቱም ሀገራት ኢኮኖሚያዊ እና ፖለቲካዊ እድገት እና ትስስር ትልቅ አስተዋፅኦ እንዳለው ተናግረዋል፡፡ ዘገባው የኤዥያን ታይምስ ነው፡፡

Tuesday, 04 November 2014 10:49

በኢቦላ ቫይረስ ስርጭት በከፍተኛ ሁኔታ ተጎድተዋል ከተባሉ የምዕራብ አፍሪካ ሀገራት የሚመጡ ዜጎች ላይ ከበድ ያለ የቪዛ ህግ ማስቀመጧን ሲንጋፖር አስታውቃለች፡፡

ጥቅምት 25/2007 ዓ.ም

ወደ ሲንጋፖር የሚገቡት ላይ የሚደረገው ይኸው ቁጥጥር ሙሉ ለሙሉ ተግባራዊ የሚደረገው ከረቡዕ ጀምሮ መሆኑም ታውቋል፡፡ የሀገሪቱ የጤና ጥበቃ ሚኒስቴር ይፋ ባደረገው መረጃ መሰረት በጊኒ፣ ላይቤሪያና ሴራሊዮን ዜጎች ላይ የሚደረገው ይኸው ቁጥጥር በተሻለ መልኩ ደህንነቱን ለማስጠበቅ ያለመ ነው፡፡ የሲንጋፖር መገናኛ ብዙሃን 2 በኢቦላ የተጠረጠሩ ሰዎች መኖራቸውን ይፋ አድርገው የነበረ ቢሆንም ሁለቱም በተደረገላቸው ምርመራ ነፃ መሆናቸው ተረጋግጧል፡፡ ዜናው የቢቢሲ ነው፡፡