በአፍሪካ ኦስካር የተዋንያንና የፊልም ባለሙያዎች ሽልማት አሸናፊ የሆኑት ኢትዮጵያውያን አርቲስቶች ሽልማታቸውን ለመቀበል በመጭው ህዳር ወር ወደ ካሊፎርኒያ ያቀናሉ ተባለ፡፡

ነሐሴ 21/2008 ዓ.ም ናፍካ በተሰኘው የአፍካውያንና የጥቁሮች የፊልም ሙያተኞች ዓመታዊ የሽልማት መድረክ ላይ ኢትዮጵያን ለመጀመሪያ ጊዜ ወክለው ከተወዳደሩት የሃገራችን ሙያተኞች መካከል ተዋናይ ግሩም ኤርሚያስ በምርጥ ወንድ አፍሪካዊ ተዋናይ እና ተዋናይት ሩታ መንግስተአብ በምርጥ ሴት ተዋናይት ዘርፍ ማሸነፋቸው ተረጋግጧል፡፡ በድረ-ገጽ በተሰጠ የህዝብ ድምፅ ብዛት ከየዘርፋቸው ቀዳሚ በመሆን ያሸነፉት ተዋንያኑ ለዚህ ድል ቁልፍ አስተዋፅኦ ያበረከተውን ኢትዮጵያዊ እና ትውልደ ኢትዮጵያዊ በሙሉ አመስግነዋል፡፡ በሆሊውድ እውቅና ያለው የናፍካ ሽልማት መድረክ ዘንድሮ ለ6ኛ ጊዜ የሚካሄድ ሲሆን ለመጀመሪያ ጊዜ የቀጥታ የቴሌቪዥን ስርጭት ሽፋን ይኖረዋል ተብሎ እንደሚጠበቅ ተዋንያኑ በትናንትናው ዕለት ጉዳዩን አስመልክቶ በሰጡት መግለጫ ላይ ተናግረዋል፡፡ በተጨማሪም ይህ ሽልማት የኢትዮጵያን ገፅታ በዓለም አቀፍ መድረክ ለማስተዋወቅ እና በተለይም በዘርፉ ለተሰማሩት የኪነ-ጥበብ ሰዎች አነቃቂ እና ፈር ቀዳጅ ጉዞ እንደሚሆን እምነታቸውን ገልፀዋል፡፡ (እንደገና ደሳለኝ)

Leave a comment

Make sure you enter the (*) required information where indicated. HTML code is not allowed.