በአዲስ አበባ በደረሰ የተሸከርካሪ አደጋ 4 ሰዎች ህይወታቸው አለፈ፡፡

መስከረም 10/2009 ዓ.ም

ዛሬ ማለዳ ኮድ 3 42561 ኦሮ የሆነ ተሸከርካሪ ከፒያሳ ወደ ጥቁር አንበሳ እያመራ በነበረበት ጊዜ ቴዎድሮስ አደባባይ እንደደረሰ በገጠመው የቴክኒክ ችግር ፍሬን መያዝ ባለመቻሉ በአካባቢው በነበረ የተቆፈረ ጉድጓድ ውስጥ ገብቷል፡፡

አሽከርካሪው አስቀድሞ የቴክኒክ ብልሽት እንደገጠመው ለተሳፋሪዎች በመግለፅ ከመኪናው እንዲወጡ መልዕክቱን ያስተላለፈ ሲሆን ረዳቱ እና አንዲት ተሳፋሪ ተሸከርካሪው እየተጓዘ ዘለው መውረዳቸውን ለማወቅ ተችሏል፡፡

ተሸከርካሪውም ሹፌሩን ጨምሮ የተቀሩት 11 ተሳፋሪዎችን በመያዝ 8 ሜትር ርዝመት፤ 70 ሜትር ስፋት ባለው ጉድጓድ ውስጥ መግባቱን የአዲስ አበባ እሳትና ድንገተኛ አደጋዎች መከላከልና መቆጣጠር ባለስልጣን የህዝብ ግንኙነት ባለሙያ አቶ ንጋቱ ማሞ ለዛሚ 90.7 ኤፍ ኤም ተናግረዋል፡፡

ከአደጋው በኋላ ሰባቱ በህይወት መትረፍ ሲችሉ አራቱ ህይወታቸው አልፏል፡፡ ከሟቾች ውስጥም ሶስቱ ሴቶች ሲሆኑ አንዱ ወንድ መሆኑ ታውቋል፡፡

መጀመሪያ የወረዱትን ረዳት እና አንዲት ተሳፋሪ ጨምሮ ዘጠኙ ተጎጂዎች በአሁን ሰዓት በአቤት ሆስፒታል ህክምና እየተደረገላቸው ይገኛል፡፡

- ምስል ምንጭ፡ EthiopiaFirst.com

Leave a comment

Make sure you enter the (*) required information where indicated. HTML code is not allowed.